Parabrahmadhārā

 

Mangalam

Sahitah Swāminā nityamāste nārāyaṇo harih;

Swāminārāyaṇastasmāt kīrtyate samupāsyate. 213

Prakaraṇa-sangatih

Swāmipadā’bhidheyam tu pūrvamito nirūpitam;

Nārāyaṇā’bhidheyam yat tadiha vinirūpyate. 214

Brahmavidyā yatah kārtsnyam bhajechchhāstra-prabodhitā;

Ubhau samāhitau yasyām-akṣharapuruṣhottamau. 215

Parabrahma-swarūpa-nirūpaṇam

Paramātmā param brahma sarveshvareshvaro harih;

Nārāyaṇashcha sarvagnah kṛupāluh puruṣhottamah. 216

Māyā’tītashcha nirdoṣhah sākṛutirmānavā’’kṛutih;

Nityah sarvasamutkṛuṣhṭa eko’yam naiva tatsamah. 217

Divyaguṇavishiṣhṭo’yam māyikaguṇa-varjitah;

Antaryāmī sarvakartā guṇā’tīto niyāmakah. 218

Mūrtimad0brahmaṇā nityam muktaistadbhāva-bhāvitaih;

Sevyate dāsabhāvena hyakṣharadhāma-sansthitah. 219

Upādānam nimittam cha kāraṇam jagato matah;

Sarvādhārah swatantrashcha kartā hartā niyāmakah. 220

Swadhāmasthita evā’yam sakalā’nvitatām gatah;

Vyatirikto’nvito’pīha Swāminārāyaṇo harih. 221

Manuṣhyādijanerdātā sarvakarma-fala-pradah;

Sarva-jnyāna-kriyechchhānām shakterdātā dayā’nvitah. 222

Divyasankalpa-mātreṇa naikānāmuddidhīrṣhayā;

Sakalaishvarya-sampanno dhāmni sanneva jāyate. 223

Divyā’’nandapradānāya mānuṣhīm tanumāshritah;

Divyatāmajahanneva līlāmātiṣhṭhate prabhuh. 224

Sa eva sahajānandah Swāminārāyaṇo harih;

Paramātmā param brahma bhaktijo dharmanandanah. 225

Sa eva paramopāsyo bhajanīyashcha bhāvatah;

Japyashchā’’shrayaṇīyashcha kīrtanīyashcha sarvadā. 226

Sa eva prakaṭo nityam pratyakṣhe brahmaṇi gurau;

Sahitah sakalaishvaryaih samyagānandadāyakah. 227

Anupraveshanāt tasya tattajjīveshvarātmasu;

Avatārāh prajāyante tallabdhaishvarya-bhūṣhitāh. 228

Vibhavā avatārāh syurharīchchhāvashamāgatāh;

Tattatkārya-nimittaistu hyasankhyakā bhavanti cha. 229

Vyūhāstathaiva vijnyeyāh parātmalabdhabhūtayah;

Tatsarvachetanā’’tmāno mitho bhinnāh swarūpatah. 230

Parabrahmādipadā’bhidheyatve pravṛuttinimittam

Vyapadiṣhṭam parabrahma yasmāddhi brahmaṇah param;

Akṣharah puruṣho gītastasmāchcha puruṣhottamah. 231

Aishvaryam dhāryate nityam vyāpanashāsanādikam;

Balashaktyādimattvam cha bhagavānuchyate tatah. 232

Jīveshvarā’’tmanāmātmā sarvā’’tmotkṛuṣhṭatām dharan;

Sarvā’’tmanāmupāsyashcha paramātmeti kīrtitah. 233

Īshvarebhyah paro yasmāt parameshvara uchyate;

Māyāniyamanāchchaiva māyīti paribodhitah. 234

Ekatvam

Swarūpam bhidyate naiva kāryabhedāt kadā’pi tat;

Ekam sadeva naikānām vidhānām grahaṇe prabhu. 235

Kvachidanupraveshena kvachit tena vinaiva cha;

Brahmaṇi nityavāso hi na tatrā’nupraveshanam. 236

Na muktāvapyabhedah syād brahmaṇā parabrahmaṇā;

Brahma-sādharmyamāptānām tatra bhaktih sadā sthitā. 237

Upādānatve’pi nirvikāritvam

Vyāpanāchchhāsanāchchaiva paropādānatā matā;

Vikṛutih prakṛutau jātā na sā brahmaparātmanoh. 238

Paratvam

Yatra sarvam gatam kāṣhṭhām guṇaishvaryādi vāstavam;

Na tatparam tu kasyā’pi kimapi tu kadāpi tu. 239

Brahmatah shreṣhṭhatā chā’pi shrutyaiva bodhitā yadā;

Kā kathā hyanyajīvānām īshvarāṇām tathaiva cha. 240

Asankhyeyā’vatārāṇām brahmanyūnatvabhājinām;

Tasmāt sarvasamutkṛuṣhṭah Swāminārāyaṇo harih. 241

Ekamevā’dvitīyam tat paramam brahma sarvadā;

Tatsamā’bhyadhikā’bhāvāt sṛuṣhṭiniyamahetutah. 242

No chenniyantṛubāhulyād ichchhā’bhiprāyabhedatah;

Vyavasthābhangadoṣhāddhi sṛuṣhṭyādyanupapannatā. 243

Madbhāvam mama sādharmyam paramam sāmyamuktitah;

Brahmabhāvam vijānīyād abhāvāttatparasthiteh. 244

Parama-sukha-pradātṛutvam

Jnyānā’’nandaswarūpo’yam jnyānā’’nandau bibhartyapi;

Sarvajnyānamayo nityam sarvā’’nandapradāyakah. 245

Kartṛutvam

Kalyāṇam paramam bhūyānnaikajīveshvarā’’tmanām;

Idamekam kṛupālostu sṛuṣhṭau prayojanam matam. 246

Jīvānāmīshvarāṇām cha tattatkarmā’nusāratah;

Tatkarmafalabhogāya vishvamidam virachyate. 247

Nā’to vaiṣhamyanairghṛuṇye dayaiva paramātmanah;

Yogyān dehendriyādīnshcha yachchhati mochayatyapi. 248

Ichchhāshakteh kriyāshakter-jnyānashakteh pradāyakah;

Ato nityam parā’dhīnā jīveshvarā’’tmakartṛutā. 249

Sarvagnatvam

Kartṛutvājjnyātṛutā siddhā jnyānyeva kurute yatah;

Karaṇādyanapekṣham tu jnyānam sakaraṇasya tat. 250

Yugapannikhilam vetti vinā yatnam sadā swatah;

Sankalpe prathamam sṛuṣhṭam vishvam teneti sarvavid. 251

Anvayitvam vyatirekitvam cha

Anvito naganadyādau jīveshvarā’’tma-sansthitah;

Pratimāsu visheṣhashcha vibhaveṣhvapi tiṣhṭhati. 252

Sarvā’’dhikyena samyak tu brahmaṇyevā’nvito harih;

Tāratamyāttu pātrāṇāmakṣharam sarvato’dhikam. 253

Dhāmni muktairanantairyat sevyamānam virājate;

Loke’sminnavatīrṇam cha vyatireki prakīrtitam. 254

Anvito vyatirikto vā swarūpam naiva bhidyate;

Naiva nyūnādhikatvam cha nān’shān’shitvam kadāchana. 255

Bhāgena kenachid vā na vyatireko’nvayo’pi cha;

Tatsāmarthyādikam sarvam sarvathā sarvadā samam. 256

Parabrahmaṇah saguṇatvam nirguṇatvam cha

Saguṇam nirguṇam cheti param brahma nirūpitam;

Saguṇam tu guṇaughatvānmahattvāt sarvatastathā. 257

Nirguṇamapi tajjnyeyam shūnyatvānmāyikairguṇaih;

Sūkṣhmā’tisūkṣhmatāyāshcha yajjnyānānmuchyate’shubhāt. 258

Sākṛutikatvam

Īkṣhaṇam shrūyate tasya prashne muktagaṇasya cha;

Sākārah sahajānando divyasundara-vigrahah. 259

Sākṛutireva kartā’yam sākṛutirvyāpako matah;

Sākṛutireva shāstā sa nityam sākṛutiko harih. 260

Yashcha karaṇa-rūpāderniṣhedhah shrūyate shrutau;

Māyikasyaiva sa jnyeyo divyasya tatra rūpaṇāt. 261

Tatrā’pi mānavākārah kishoro dvibhujah sadā;

Chaturaṣhṭabhujatvādi kvāchitkam svechchhayā kṛutam. 262

Tasmāddhareh swarūpam tu sākārameva sarvadā;

Iti bhāvanayā nityam tadupāstirhi mokṣhadā. 263

Nirākārādibhāvā’’ḍhyā drohanigraha-bandhakṛut;

Sākāratve hareh prītih sharkarākhaṇḍavad bahuh. 264

Sarvoparitvam

Swatah sarvasamutkṛuṣhṭah sarvatra sarvathā sadā;

Guṇaishvaryādibhih kvā’pi ko’pi na tatsamo bhavet. 265

So’yam shrīsahajānandah sarvopari parātparah;

Swāminārāyaṇah sākṣhād yasmānna vidyate parah. 266

Pratyakṣhatvam

Pratyakṣho’stīti siddhāntam Swāminārāyaṇo bhuvi;

Pūrvamanupadiṣhṭam cha vishiṣhṭamāha shāshvatam. 267

Adyaiva vartamānam yad naratanau virājitam;

Pratyakṣhamiti tajjnyeyam pashyaddhi vicharat tathā. 268

Sākṣhād bhojanavārtādi cheṣhṭā-charitra-chintanam;

Pratyakṣham labhyate yasmāt sahavāsādinā punah. 269

Sevitah Sahajānando bhaktaistatkālikairmudā;

Pratyakṣham samprati jnyeyam gururūpeṇa sansthitam. 270

Samyag vāso yatastatra hyudbhutasarvashaktikah;

Nārāyaṇaswarūpam tat pratyakṣhamiti sevyate. 271

Divyatvam

Divyo divyā’tidivyo’yam swasangād divyatāpradah;

Divye dhāmni sadā divyo divya ihaa samāgatah. 272

Mānuṣhe divyatām pashyan chintayan varṇayan likhan;

Divyānandam prabhunjīta kṛupāto divyatānidheh. 273

Samprāpyā’kṣhararūpatvam bhajet puruṣhottamam;

Ityādi-sahajānanda-vākyānmānā’ntaraistathā. 274

Grathito yena shabdo’yam-akṣharapuruṣhottamah;

Gurūṇām gurave tasmai shāstriṇe’stu namo namah. 275

Vijnyāpya brahma-parabrahma-surūpayugmam

 Prasthāpya dhātupratimā bhuvi mandireṣhu;

Yenā’njalirvirachito viralo’stu tasya

 Dvāre hi yagnapuruṣhasya shubhānjalirme. 276