મને શીખવો તવ આતમ સંગીત હે પ્રમુખસ્વામી,

 શીખવો તવ આતમ સંગીત,

મારે રીઝવવા આપને અમિત હે પ્રમુખસ્વામી,

 શીખવો તવ આતમ સંગીત. ધ્રુવ.

સાધનાને પંથ હજી ઘૂંટતો જ ષડ્જ અને જોયું તો આંખો થઈ ચાર,

સાતેય સૂર દીઠા એક એક સાગર ને કેમ કરી ઊતરવું પાર,

હવે આપ કહો એ જ રીતે રીત હે પ્રમુખસ્વામી,

 શીખવો તવ આતમ. ૧

આપ કહો એ જ સ્વરો વાદી ને સંવાદી, આપ કહો એ જ લય તાલ,

તનના તંબૂરનેય આપ સ્વરે મેળવી હું ઝંકારું આપનું જ વ્હાલ.

મારે ગાવાં નવ ગુણલાનાં ગીત હે પ્રમુખસ્વામી,

 શીખવો તવ આતમ. ૨

મનની મુજ મોરલીનાં છિદ્રોને ભરી ભરી રેલાવો રાગ મલ્હાર,

અંતરની રેત ઉપર મેઘ બની ઊતરશે સ્વામી તુજ હૈયાનો હાર,

મારે ભીંજાવું આપ સંગ નિત હે પ્રમુખસ્વામી,

 શીખવો તવ આતમ. ૩