હરિગીત છંદ

સિતસાન્દ્ર - સદ્‌વસનાલિનં વરમાલ્યમંજુલમાલિનં
  ચલિતાલિનં પૃથુમાલિનં નવપુષ્પભૂષણશાલિનમ્ ।
વૃષપાલિનં શ્રિતલાલિનં જપમાલિકા-પરિચાલિનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૧॥

શ્વેત ઘાટાં સુંદર વસ્ત્રોથી શોભતા, શ્રેષ્ઠ પુષ્પોની સુંદર માળાવાળા, તે જ કારણથી જેમના ઉપર ભમરા ફરી રહ્યા છે એવા, મોટી માળાને ધારનાર, નવીન પુષ્પનાં આભૂષણ ગજરા બાજુબંધ આદિથી શોભતા, ધર્મનું રક્ષણ કરનાર, આશ્રિતોનું લાલન-પાલન કરનાર, જપમાળાને ફેરવતા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૧)

મલજાલભૃત્ – કલિકંડનં જનમિત્ર – સજ્જનમંડનં
  સ્મરતંડનં મદભંડનં કૃતદુષ્ટમાનવ – દંડનમ્ ।
જિત – ચંડનં સ્મયકંડનં કૃતભૂરિ – દુર્મતખંડનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૨॥

અનેક પ્રકારના પાપના સમુદાયને ધારણ કરનારો જે કળિયુગ તેનો નાશ કરનારા, કામદેવનો નાશ કરનારા, મદનું ખંડન કરનારા, દુરાચારીઓને દંડ આપનારા, જીત્યો છે ક્રોધ જેમણે એવા, ગર્વનો નાશ કરનારા, અનેક દુષ્ટમતોનું ખંડન કરનારા, સર્વજનના સુહૃદ, સત્પુરુષોના ભૂષણરૂપ અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૨)

વૃષવૈરિ – દર્પવિદારિણં શ્રિતજાત – સંસૃતિહારિણં
  અવતારિણં શુભકારિણં મણિહેમ-ભૂષણધારિણમ્ ।
જનભન્દનં મુનિવન્દનં પરિચર્ચિતોત્તમચન્દનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૩॥

ધર્મના વેરીઓના ગર્વને નાશ કરનારા, આશ્રિતજનોના સંસૃતિબંધનને નાશ કરનારા, અવતારોના અવતારી એવા, મંગળને કરનારા, મણિ અને સુવર્ણનાં અલંકારોને ધારણ કરનારા, જનોનું કલ્યાણ કરનારા, મુનિજનોનો સત્કાર કરવાવાળા, ઉત્તમ ચંદનથી પૂજા કરાયેલા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૩)

જિતદોષણં શ્રિતતોષણં કૃતધર્મવંશ – વિપોષણં
  ક્ષતરોષણં શ્રુતજોષણં નિજભક્ત-માનસપોષણમ્ ।
જનબોધનં મતિશોધનં પ્રિયનમ્ર – શાન્ત – તપોધનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૪॥

જેમણે દૂષણો જીતી લીધાં છે એવા, ભક્તોને સંતોષ આપનારા, ધર્મવંશનું પોષણ કરનારા, ક્રોધરાગદ્વેષાદિનો નાશ કરનારા, શાસ્ત્રમાં પ્રીતિવાળા, પોતાના ભક્તોના મનને પોષનારા, જનોને બોધ આપનારા, બુદ્ધિને નિર્મળ કરનારા, નમ્ર, શાંત તથા તપસ્વી ભક્તજનો જેમને પ્રિય છે એવા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૪)

હૃતભક્તિ – મજ્જનવાસનં શતકોટિભાસ્કરભાસનં
  જનશાસનં ગરુડાસનં સ્વનુરક્તભક્ત – સભાસનમ્ ।
હૃતશોચનં ઘનરોચનં કૃતબદ્ધજીવ – વિમોચનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૫॥

સ્વીકારી છે ભક્તિમાં ડૂબવાની વાસના જેમણે, સેંકડો સૂર્યોની માફક દેદીપ્યમાન, જનોને ઉપદેશ આપનારા, ગરુડના આસનવાળા, પોતામાં સારી પેઠે પ્રેમ રાખનારા ભક્તોની સભામાં વિરાજમાન, શોકાદિનો નાશ કરનારા, અત્યંત શોભતા, બદ્ધ જીવોને મુક્તિ આપનારા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૫)

ભુવનોદ્‌ભવાદિવિધાયિનં ભવહારિ-સદ્‌ગુણનાયિનં
  અનપાયિનં સુખદાયિનં હિતકારિ-સજ્જનયાયિનમ્ ।
જનપાવનં સ્વજનાવનં શુભધર્મભક્તિ – વિભાવનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૬॥

બ્રહ્માંડોની ઉત્પત્તિ, સ્થિતિ ને લય તેને કરનારા, ભવાટવીનો નાશ કરનારા ને ઉત્તમ ગુણોને ધારણ કરનારા, અવિનાશી સુખોને આપનારા, હિતકારી સજ્જનોને આશ્રય આપનારા, જનોને પવિત્ર કરનારા, પોતાના ભક્તોનું રક્ષણ કરનારા, ઉત્તમ ધર્મ તેમ જ ઉત્તમ ભક્તિનો વિસ્તાર કરનારા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૬)

નિજભક્ત – પદ્મવિકાશિનં દુરતિક્રમાર્તિ-વિનાશિનં
  સ્વવિલાસિનં મતિદાશિનં પ્રિયદંભહીન-નિરાશિનમ્ ।
ક્ષતખેદનં શુભવેદનં યમદૂત – ભીતિવિભેદનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૭॥

પોતાના ભક્તરૂપી કમળોનો વિકાસ કરનારા, અવશ્ય થનારી આપત્તિઓના નાશ કરનારા, નિજસ્વરૂપમાં રમણ કરનારા, સદ્‌બુદ્ધિને આપનારા, દંભી જનોની હીનવૃત્તિઓનો નાશ કરનારા, વાસનાજન્ય દુઃખોને ટાળનારા, કલ્યાણને આપનારા, યમના ભયને દૂર કરનારા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૭)

અસુરાંશ – દેશિકગંજનં શ્રિતવૃન્દ – માનસ – મંજનં
  નિજરંજનં ભવભંજનં ગુણનીરરાશિ – નિરંજનમ્ ।
મુનિમાનનં પ્રિયકાનનં નવપદ્મચન્દ્ર – વરાનનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૮॥

અસુરમાર્ગના ઉપદેશક ગુરુઓનો પરાજય કરનારા, આશ્રિત ભક્તોના સમુદાયના મનને પવિત્ર કરનારા, પોતાના ભક્તોને આનંદ આપનારા, જન્મ-મરણના ફેરાને ટાળનારા, સદ્‌ગુણોના સમુદ્ર, પ્રાકૃત ગુણોના સમુદાયથી મુક્ત, મુનિજનોને માન આપનારા, પ્રિય છે વન જેમને તેવા, નવીન કમળ અને ચંદ્ર સમાન શ્રેષ્ઠ મુખારવિંદવાળા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૮)

નૃપદેવમુક્ત – સભાજિતં શ્રુતિશાસ્ત્રવેદિ-સભાજિતં
  સકલાજિતં સુજનાજિતં ગુણભાજિવાજિ-નિરાજિતમ્ ।
શ્રિતનોદનં મુનિમોદનં દલિતક્ષમા-ખિલતોદનં
  પ્રણમામિ ધર્મસુતં હરિં શુભકારિ-સદ્‌ગુણમાલિનમ્ ॥૯॥

રાજાઓ, દેવો અને મુક્તો વડે પૂજાયેલા, વેદશાસ્ત્રને જાણનારાઓની સભાને જીતનારા, કોઈથી પણ પરાજય નહીં પામેલા, સજ્જનો વડે પમાયેલા, ગુણવાનોના સમુદાયમાં શોભતા, આશ્રિતોને પ્રેરણા આપનારા, મુનિજનોને આનંદ આપનારા, ક્ષમાથી દલિતોનાં સમગ્ર દુઃખોનો નાશ કરનારા અને કલ્યાણકારી અસંખ્ય સદ્‌ગુણોથી શોભતા એવા ધર્મપુત્ર શ્રીહરિને હું પ્રણામ કરું છું. (૯)