કીર્તન મુક્તાવલી
જંગલ વસાવ્યો જોગીએ
૧-૪૭૭: સદ્ગુરુ નિષ્કુળાનંદ સ્વામી
Category: ઉપદેશનાં પદો
પદ - ૧
જંગલ વસાવ્યો જોગીએ, તજી જેણે તનડાની આશજી;
વાત ન ગમે આ વિશ્વની, આઠો પહોર ઉદાસજી... જંગલ꠶ ૧
સેજ-પલંગે પોઢતા, મંદિર ઝરૂખા માંયજી;
તેને નહીં રે તૃણ-સાથરો, રહેતા તરુતલ છાંયજી... જંગલ꠶ ૨
શાલ દુશાલા ઓઢતા, ઝીણા જરકશી જામાજી;
તેણે રાખી રે કંથા ગોદડી, સહે શિર શીત ને ઘામજી... જંગલ꠶ ૩
ભાવતાં ભોજન જમતા, અનેક વિધનાં અન્નજી;
તે રે માગણ લાગ્યા ટુકડા, ભિક્ષા ભુવન ભુવનજી... જંગલ꠶ ૪
હાજી કહેતાં હજાર ઉઠતાં, ચાલતાં લશ્કર લાવજી;
તે નર ચાલ્યા રે એકલા, નહીં પેજારું પાવજી... જંગલ꠶ ૫
રહો તો રાજા રસોઈ કરું, જમતા જાઓ જોગીરાજજી;
ખીર નિપજાવું† ક્ષણું એકમાં, તે તો ભિક્ષાને કાજજી... જંગલ꠶ ૬
આહાર કારણે જે ઊભો રહે, કરી એકની આશજી;
તે જોગી નહીં ભોગી જાણવો, અંતે થાયે વણાશજી... જંગલ꠶ ૭
રાજ સાજ સુખ પરહરી, જે જન લેશે જોગજી;
ધન રે દારામાં તે નહીં ધસે, રોગ સમ જાણે ભોગજી... જંગલ꠶ ૮
ધન્ય એ ત્યાગ વૈરાગ્યને, તજી જેણે તનડાની આશજી;
કુળ રે તજીને નિષ્કુળ થયા, તેનું કુળ અવિનાશજી... જંગલ꠶ ૯
†નિપાવું
Jangal vasāvyo jogīe
1-477: Sadguru Nishkulanand Swami
Category: Updeshna Pad
Pad - 1
Jangal vasāvyo jogīe,
tajī jeṇe tanḍānī āshjī;
Vāt na game ā vishvanī,
āṭho pahor udāsjī... jangal 1
Sej-palange poḍhtā,
mandir jharukhā māyjī;
Tene nahi re truṇ-sāthro,
rahetā tarūtal chhāyjī... jangal 2
Shāl dushālā oḍhtā,
jhīṇā jarkashī jāmājī;
Tene rākhī re kanṭhā godaḍī,
sahe shir shīt ne ghāmjī... jangal 3
Bhāvtā bhojan jamtā,
anek vidhnā annajī;
Te re māgaṇ lāgyā ṭukaḍā,
bhikshā bhuvan bhuvanjī... jangal 4
Hājī kahetā hajār ūṭhtā,
chāltā lashkar lāvjī;
Te nar chāḷyā re eklā,
nahi pejāru pāvjī... jangal 5
Raho to rājā rasoī karu,
jamtā jāo jogīrājjī;
Khīr nipjāvu kshaṇu ekmā,
te to bhikshāne kājjī... jangal 6
Āhār kāraṇe je ūbho rahe,
karī eknī āshjī;
Te jogī nahi bhogī jāṇvo,
ante thāye vaṇāshjī... jangal 7
Rāj sāj sukh parharī,
je jan leshe jogjī;
Dhan re dārāmā te nahī dhase,
rog sam jāṇe bhogjī... jangal 8
Dhanya e tyāg vairāgyne,
tajī jeṇe tanḍānī āshjī;
Kuḷ re tajīne nishkuḷ thayā,
tenu kuḷ avīnāshjī... jangal 9
