રહી તો જુઓ તમે રહી તો જુઓ, પ્રમુખસ્વામીના ગમતામાં રહી તો જુઓ;

થઈ તો જુઓ તમે થઈ તો જુઓ, પ્રમુખસ્વામીના એક વાર થઈ તો જુઓ. રહી તો. ધ્રુવ

જાતને ઘસીને આ દુનિયાને રીઝવતાં, પામ્યા બસ રાખનાં પડીકાં,

કો’કના થવામાં તો ખુદનુંય ખોયું ને શમણાંના રંગ ઠર્યા ફીકા;

 ભવભવથી મનનું જ ગમતું કર્યું, હવે સ્વામી કહે એમ કરી તો જુઓ. રહી તો જુઓ. ૧

જેવું છે મનમાં, તેવું વચનમાં, વર્તનમાંય નહીં જુદા,

નહિ કોઈ સ્વારથ, કેવળ પરમારથ, ક્યાંથી મળે એ સાધુતા?!

 પ્રમુખસ્વામીને તમે પરખી જુઓ, મુક્તિના દાતાને નિરખી જુઓ;

 પરખી નિરખી હરખી જુઓ. રહી તો જુઓ. ૨

ઝાઝું ના ફાવે તો એને જ જોઈને, આંખ મીંચી જાવું વર્તી,

એના જે એક વાર થઈને રહ્યા તે તો, સુખે ગયા જગ જીતી;

 જન્મોજનમ તમે કેટલુંય હાર્યા, હવે આટલો જ દાવ તમે રમી તો જુઓ. રહી તો. ૩