ભક્તિનિધિ
મંગલાચરણ
સોરઠા
પ્રણમું પુરુષોત્તમ, અગમ નિગમ જેને નેતિ કહે ।
તે શ્રીહરિ થાઓ સુગમ, રમ્યરૂપ સાકાર સહિ ॥૧॥
એવા વસો મારે ઉર, દૂર કરવા દોષ દીનબંધુ ।
તે થાય ભક્તિ ભરપૂર, હજૂર રાખજો હરિ હેત કરી ॥૨॥
દોહા
ભક્તિ સરસ સહુ કહે, પણ ભક્તિ ભક્તિમાં ભેદ ।
ભક્તિ પ્રભુ પ્રગટની, એમ વદે છે ચારે વેદ ॥૩॥
પરોક્ષ ભક્ત પામે નહિ, મનમાની મોટી મોજ1 ।
શાસ્ત્ર સર્વે શોધીને, ખરી કરી લ્યો ખોજ ॥૪॥
ભક્તિનિધિ
કડવું - ૧
રાગ: ધન્યાશ્રી
શ્રી પુરુષોત્તમ પૂરણ બ્રહ્મજી, નેતિ નેતિ કહી જેને ગાય નિગમજી ।
અતિ અગાધ જે સહુને અગમજી, તે પ્રભુ થયા આજ સુગમજી ॥૧॥
રાગ: ઢાળ
સુગમ થયા શ્રીહરિ, ધરી નરતનને નાથજી ।
જીવ બહુ કહું જક્તના જેહ, તેહને કરવા સનાથજી ॥૨॥
આપ ઇચ્છાએ આવિયા, કરવા કોટિકોટિનાં કલ્યાણ ।
દયા દિલમાં આણી દયાળે, તેનાં શું હું કરું વખાણ ॥૩॥
લે’રી2 આવ્યા આજ લે’રમાં, અતિ મે’ર કરી મે’રબાન ।
અનેક જીવ આશ્રિતને, આપવા અભયદાન ॥૪॥
અઢળ ઢળ્યા અલબેલડો, કહું કસર ન રાખી કાંય ।
કૈક જીવ કૃતાર્થ કીધા, મહાઘોર કળિની માંય ॥૫॥
ભાગ્યશાળી બ્રહ્મમો’લનાં, કર્યાં આપે આવી અગણિત ।
નિર્દોષ કિધાં નરનારને, રખાવી રૂડી રીત ॥૬॥
નૌતમ શક્કો3 સંસારમાં, આવી નાથે ચલાવિયો નેક ।
જે સાંભળ્યો નો’તો શ્રવણે, તે વર્તાવ્યો સહુથી વિશેક ॥૭॥
પૂરણ પુરુષોત્તમ પોતે, સરવેશ્વર સર્વના શ્યામ ।
જેની ઉપર જડે નહિ બીજો, તેહ કરે ધારે જેહ કામ ॥૮॥
પ્રબળ પ્રતાપી પધારતાં, સમજવું શું શું ન થાય? ।
સમર્થ સહુથી શ્રીહરિ, જે પૂરણકામ કે’વાય ॥૯॥
અતિ અગમ તે સુગમ થયા, થયા સેવી સુખ લેવા લાગ્ય ।
નિષ્કુળાનંદ મળ્યા એહ જેહને, તેહનાં ઊઘડિયાં ભાગ્ય ॥૧૦॥