ભક્તિનિધિ
કડવું – ૨૮
રાગ: ધન્યાશ્રી
કરવું હતું તે કરી લીધું કામજી, ભક્તિ કરી રીઝવ્યા ઘનશ્યામજી ।
જે ઘનશ્યામ ઘણા સુખના ધામજી, તેને પામવા હતી હૈયે હામજી ॥૧॥
રાગ: ઢાળ
હામ હતી હૈયે ઘણી, પ્રભુ પ્રગટ મળવા કાજ ।
આ દેહે કરી જે દીનબંધુ, જાણું ક્યાંથી મળે મહારાજ ॥૨॥
આ નેણે નીરખીયે નાથને, મુખોમુખ કરિયે વાત ।
આવે અવસર એવો ક્યાં થકી, જે પ્રભુ મળે સાક્ષાત ॥૩॥
અંગોઅંગ એને મળવું, તે તો મહા મોંઘો છે મેળાપ ।
નો’તો ભરોંસો ભીંતરે,1 જે મળશે અલબેલો આપ ॥૪॥
જમવું રમવું જોડે બેસવું, એવો ક્યાં થકી પામિયે પ્રસંગ ।
મોટા મોટાને મુશ્કેલ મળવો, સુણી સદા રે’તા મનભંગ2 ॥૫॥
સર્વે પ્રકારે સાક્ષાત સંબંધ, જેનો અતિ અગમ3 અગાધ્ય ।
તેહ મળે કેમ મનુષ્યને, જે દેવને પણ દુરારાધ્ય4 ॥૬॥
તેહ પ્રભુજી પ્રસન્ન થઈ, નરતન ધરી મળ્યા નાથ ।
તેણે સર્વે રીતે સુખ આપિયાં, થાપિયા5 સહુથી સનાથ ॥૭॥
હળી મળી અઢળ6 ઢળીને,7 આપી ભક્તિ આપણી8 ।
તેહ ભક્તિને ભવ બ્રહ્માએ, માગી મગન થઈ ઘણી ॥૮॥
ભક્તિમાં છે ભાર9 ભારે, તે જેને તેને જડતી નથી ।
પુણ્યવાન કોઈ પામશે, વારેવારે શું કહિયે કથી ॥૯॥
પ્રગટની પરિચરિયા, છે માનવીઓને મોંઘી ઘણી ।
નિષ્કુળાનંદ એ નૌત્તમ નિધિ, સૌ સમઝો છે સુખતણી ॥૧૦॥