ભક્તિનિધિ
કડવું – ૧૬
રાગ: ધન્યાશ્રી
ઉરમાંહિ કરવો એમ વિવેકજી, પ્રગટની ભક્તિ સહુથી વિશેકજી ।
એહને સમાન નહિ કોઈ એકજી, તે તકે1 મળે તો ન ભૂલવું નેકજી2 ॥૧॥
રાગ- ઢાળ
તે તકે મળે તો નવ ભૂલવું, સમો જોઈ રે’વું સાવધાન ।
તેમાં યોગ્ય અયોગ્ય જોવું નહિ, રાજી કરવા શ્રીભગવાન ॥૨॥
ધર્મ વિચારીને ધનંજયે,3 યુદ્ધ કરવું નો’તું જરૂર ।
પણ જાણી મરજી જગદીશની, ત્યારે ભારત4 કર્યો ભરપૂર ॥૩॥
તેમાં કુળ કુટુંબી સગા સંબંધી, સહુનો તે કર્યો સંહાર ।
ન ગણ્યા વળી ગુરુ ગોત્રને,5 સહુને પમાડ્યા પાર ॥૪॥
એવું અણઘટતું કામ કર્યું, તેમાં ગયા કંઈકના પ્રાણ ।
તોય કુરાજી કૃષ્ણ નવ થયા, સામું કર્યા પાર્થનાં6 વખાણ ॥૫॥
એ સમે એમ ગમતું હતું, તેણે પ્રભુ થયા રળિયાત7 ।
શુભાશુભનું ક્યાં રહ્યું, સહુ જુવો વિચારી વાત ॥૬॥
એમ પ્રભુ પ્રગટને, જેહ સમે ગમે જાણો જેમ ।
તેમ કરવું કર જોડીને, નવ ચડવું બીજે વે’મ8 ॥૭॥
વળી પ્રિયવ્રતે પ્રભુ પ્રસન્ન કરવા,નિવૃત્તિ મુકીને પ્રવૃત્તિ ગ્રહિ ।
તેહ જેવા આ જક્તમાં, બીજા બહુ ગણાણા નહિ ॥૮॥
માટે જે ગમે પ્રભુ પ્રગટને, તેમ જનને કરવું જરૂર ।
તેમાં હાણ્ય9 વૃદ્ધિ10 હાર જીતનો, હર્ષ શોક ન આણવો ઉર ॥૯॥
નિઃસંશય ને નરઉત્થાને,11 કરવી હરિની ભગતિ ।
નિષ્કુળાનંદ એ વારતા, મને માનજો છે મોટી અતિ ॥૧૦॥