ભક્તિનિધિ

કડવું - ૭

રાગ: ધન્યાશ્રી

ભક્તિ સમાન નથી ભવમાં કાંયજી, સમજુ સમજો સહુ મન માંયજી ।

પ્રભુ પ્રસન્ન કરવા છે અનુપ ઉપાયજી, તેને તુલ્ય બીજું કેમ કે’વાયજી ॥૧॥

રાગ: ઢાળ

કે’વાતું નથી કલ્પતરુ, નવનિધિ ને સિદ્ધિ સમેત1

કામદુઘા અમૃતની ઉપમા, ન ઘટે કહું કોઈ રીત ॥૨॥

જેમ મંદારમાં2 સાર બહુ બાવના ચંદન, પાષાણમાં સાર પારસ3

સપ્ત ધાતુમાં સરસ સુવર્ણ, તેમ ભક્તિ સાધનમાં સરસ ।૩॥

જેમ પન્નગારી4 પંખિયોમાં સરસ, શૈલમાં5 સરસ સુમેર6

તેમ ભક્તિ સરસ સર્વ સાધને, એમાં નથી કહું કાંઈ ફેર ॥૪॥

જેમ તેજોમય તનમાં સરસ સૂર્ય, શીતળ તનમાં સરસ શશી ।

તેમ ભક્તિ સરસ સર્વે રીતે, આપું ઉપમા એને કશી ॥૫॥

જેમ પાત્રમાં અક્ષયપાત્ર7 સરસ, નાણામાં સરસ સુવર્ણમો’ર ।

તેમ ભક્તિ સરસ છે ભવમાં, એમ લખ્યું છે ઠોરમઠોર8 ॥૬॥

જેમ પંચભૂતમાં શૂન્ય9 સરસ, સર્વે અમરમાં10 અમરેશ11

તેમ ભક્તિ સરસ ભગવાનની, એમાં નથી ફેર લવલેશ ॥૭॥

જેમ કુંપે સરસ રસ કુંપકા, ભૂપે સરસ પ્રિયવ્રત ।

રૂપે સરસ કામદેવ કહિયે, તેમ ભક્તિથી નૂન્ય બીજાં કૃત્ય12 ॥૮॥

કર્તવ્ય કરીને કાંઈક પામે, તે વામે13 કોઈ કાળે કરી ।

ભક્તિ એ ગતિ નિર્ભય અતિ, એમ શ્રીમુખે કહે છે શ્રીહરિ ॥૯॥

એમ ભક્તિ ભગવાનની, વર્ણવી સહુથી સરસ ।

નિષ્કુળાનંદ કે’ તે વિના બીજાં, નિશ્ચે દેખાડ્યાં નરસ ॥૧૦॥

કડવું 🏠 home