ભક્તિનિધિ

પદ - ૨

રાગ: આશાવરી

સંતો જુવો મનમાં વિચારી રે સંતો જુવો મનમાં વિચારી,

  સાચી ભક્તિ સદા સુખકારી રે... સંતો૦ ટેક

જૂઠી ભક્તિ જગતમાં કરે છે, સમઝ્યા વિના સંસારી;

ખોવા રોગ ખાય છે રસાયણ,1 દીધા વિના દરદારી2 રે... સંતો૦ ॥૧॥

વણ પૂછે વળી ચાલે છે વાટે, જે વાટે નહિ અન્ન વારી;3

નહિ પો’ચાયે નહિ વળાયે પાછું, થાશે ખરી જો ખુવારી4 રે... સંતો૦ ॥૨॥

આ ભવમાં ભુલવણી છે ભારે, તેમાં ભૂલ્યાં નરનારી;

જિયાં તિયાં આ જનમ જાણજો, હરિભક્તિ વિના બેઠાં હારી રે... સંતો૦ ॥૩॥

ભક્તિ વિના ભવપાર ન આવે, સમઝો એ વાત છે સારી;

નિષ્કુળાનંદ કહે નિર્ભય થાવા, ભક્તિનિધિ અતિ ભારી રે... સંતો૦ ॥૪॥ પદ ॥૨॥

 

કડવું - ૯

રાગ: ધન્યાશ્રી

ભક્તિમાં પણ ભર્યા છે ભેદજી, કરે છે જન મન પામે છે ખેદજી5

એક બીજાનો કરે છે ઉચ્છેદજી,6 તેનો નથી કેને ઉર નિર્વેદજી7 ॥૧॥

રાગ: ઢાળ

નિર્વેદ વિના ખેદ પામી, કરે છે ખેંચાતાણ ।

નંદે વંદે છે એક એકને, એ સહુ થાય છે હેરાણ ॥૨॥

નવે પ્રકારે કરી નાથની, ભક્તિના કહ્યા છે ભેદ ।

નિષ્કામ થઈ કોઈ નર કરે, તો શીદ પામે કોઈ ખેદ ॥૩॥

પણ અંતર ઊંડો અભાવ8 છે, બહુ બળ દેખાડે છે બા’ર ।

જ્યાન9 થયું તે જાણતા નથી, કથી10 શું કહીયે વારમવાર ॥૪॥

જેમ લેખક કરમાં લેખ આવે, તે લઈ લેખણ11 લીટો કરે ।

હતો પરવાનો12 પરમ પદનો, પણ કહો એમાંથી હવે શું સરે?13 ॥૫॥

તેમ ભક્તિ અતિ ભલી હતી, તેમાં ભેળવ્યો ભાગ ભૂંડાઈનો ।

ખીર બગડી ખારું લૂણ14 પડ્યું, ટળ્યો ઉમેદ15 એના ઉપાઈનો ॥૬॥

તેમ ભક્તિ કરતાં ભગવાનની, આવી અહં મમતની આડ16

પ્રભુ પાસળ પો’ચતાં, આડું દીધું એ લોહ કમાડ17 ॥૭॥

માટે નિરમમત18 થઈ નાથની, ભક્તિ કરો ભરી ભાવ ।

નિરાશી19 વા’લા નારાયણને, શીદ બાંધો છો જ્યાં ત્યાં દાવ20 ॥૮॥

સકામ ભક્તિ સહું કરે છે, નથી કરતા નિષ્કામ કોય ।

તેમાં નવનીત21 નથી નિસરતું, નિત્ય વલોવતાં તોય22 ॥૯॥

ઘોઘે23 જઈ કોઈ ઘેર આવ્યો, કરી આવ્યો નહિ કોય કામ ।

નિષ્કુળાનંદ એવી ભગતી, નવ કરવી નર ને વામ24 ॥૧૦॥

કડવું 🏠 home