ભક્તિનિધિ
કડવું – ૧૮
રાગ: ધન્યાશ્રી
પ્રગટ પ્રભુની જેને ભક્તિ ન આવડીજી, તેને તો ભૂલ્ય આવે ઘડી ઘડીજી ।
માગે જો મોળ્ય1 તો લાવે મોજડીજી, એવી અવળાઈની ટેવ જેને પડીજી ॥૧॥
રાગ: ઢાળ
ટેવ પડી અવડાઈની, સવળું કરતાં સૂઝે નહિ ।
એવા ભક્તની ભગતિ, સુખદાયક નો’યે સહિ ॥૨॥
પાણી માગે તો આપે પથરો, અન્ન માગે તો આપે અંગાર ।
વસ્ત્ર માગે તો આપે વાલણો,2 એવી અવડાઈનો કરનાર ॥૩॥
આવ્ય કહે ત્યાં આવે નહિ, જા કહે ત્યાં ન જવાય ।
એવા ભક્તની ભગતિ, અતિ અવળી કે’વાય ॥૪॥
બેસ્ય કહે ત્યાં બેસે નહિ, ઊભો રહે કહે ત્યાં દિયે દોટ ।
એવા સેવક જે શ્યામના, તે પામે નહિ કે’દી મોટ3 ॥૫॥
વારે4 ત્યાં વળગે જઈ, વળગાડે ત્યાં નવ વળગાય ।
એવા ભક્ત ભગવાનથી, સુખ ન પામે કહું કાંય ॥૬॥
જ્યાં રાખે ત્યાં નવ રહી શકે, નવ રાખે ત્યાં રે’વાય ।
ગ્રહે કહે તો ગ્રહી નવ શકે, મૂક્ય કહે તો નવ મુકાય ॥૭॥
એવા અનાડી5 નરને, મર મળ્યા છે પ્રભુ પ્રકટ ।
પણ આઝો6 આવે કેમ એહનો, જે ઘેલી7 રાખશે ઘટે8 પટ9 ॥૮॥
વળી બા’વરીને10 કહે બાળીશમાં, ઘણી જતન11 રાખજે ઘરની ।
તેણે મેલી અગ્નિ મોભથી,12 નવ માની શીખામણ નરની ॥૯॥
એવી અવળાઈ આદરી, કોઈ ભક્ત કરે ભક્તાઈ ।
નિષ્કુળાનંદ એ નરને, નવ થાય કમાણી13 કાંઈ ॥૧૦॥