ભક્તિનિધિ
પદ - ૭
રાગ: બિહાગડો
ભક્તિનિધિનો ભંડાર રે સંતો... ભક્તિ,
તેને શું કહું હું વારમવાર રે... સંતો૦ ।
ભક્તિ કરીને કંઈ સુખ પામ્યા, નર અમર અપાર ।
સુર નર મુનિજન સૌ કોઈ મનમાં, સમજ્યા ભક્તિમાં સાર રે; સંતો૦ ॥૧॥
ઋષિ તપસી વનવાસી ઉદાસી,1 ભાળે ભક્તિમાં ભાર ।
જાણે સેવા કેમ મળે હરિની, અંતરે એવો વિચાર રે; સંતો૦ ॥૨॥
આદિ અંતે મધ્યે મોટપ્ય પામ્યા, તે તો ભક્તિ થકી નિરધાર ।
ભક્તિ વિના ભટકણ ન ટળે, ભમવાનું ભવ મોઝાર2 રે; સંતો૦ ॥૩॥
તેહ ભક્તિ પ્રગટની પ્રીછજો,3 અતિ અનુપ ઉદાર ।
નિષ્કુળાનંદ નકી એ વારતા, તેમાં નહિ ફેરફાર રે; સંતો૦ ॥૪॥ પદ ॥૭॥
કડવું – ૨૯
રાગ: ધન્યાશ્રી
ફેર નથી રતી4 ભક્તિ છે રૂડીજી, દોયલા5 દિવસની માનજો એ મુડીજી ।
એ છે સત્ય વાત નથી કાંઈ કૂડીજી,6 ભવજળ તરવા હરિભક્તિ છે હૂડીજી ॥૧॥
રાગ: ઢાળ
હૂડી છે હરિની ભગતિ, ભવજળ તરવા કાજ ।
અપાર સંસાર સમુદ્રમાં, જબર જાણો એ ઝાજ7 ॥૨॥
સો સો ઉપાય સિંધુ8 તરવા, કરી જુવે જગે જન કોય ।
વહાણ વિનાનાં વિલખાં,9 સમજી લેવાં જન સોય ॥૩॥
તેમ ભક્તિ વિના ભવદુઃખનો, આવે નહિ કેદિયે અંત ।
માટે ભક્તિ ભજાવવી,10 સમજી વિચારીને સંત ॥૪॥
ખાધા વિના જેમ ભૂખ ન ભાંગે, તૃષા વીતે નહિ વણ તોય ।
તેમ ભક્તિ વિના ભવદુઃખ જાવા, નથી ઉપાય કહું કોય ॥૫॥
જગજીવન11 વિના જેમ નગ12 ન ભીંજે, રવિ વિના ટળે નહિ રાત ।
તેમ ભક્તિ વિના ભારે સુખ મળે, એવી રખે કરો કોઈ વાત ॥૬॥
જેમ પ્રાણધારીના પ્રાણને, જાણો આહારતણો છે આધાર ।
તેમ ભક્તિ ભગવાનની, સર્વેને સુખ દેનાર ॥૭॥
જળચરને જેમ જળ જીવન, વનચરને જીવન વન ।
તેમ ભક્ત ભગવાનનાને, જાણો ભક્તિ એ જ જીવન ॥૮॥
જેમ ઝષ13 ન રહે જળ વિના, રહે કીચે14 દાદુર15 કૂર્મ16 ।
તેમ ભક્ત ન રહે હરિભક્તિ વિના, રહે ચિત્તે ચિંતવે જે ચર્મ17 ॥૯॥
માટે ભક્તને નવ ભૂલવું, કરવી હરિની ભગતિ ।
નિષ્કુળાનંદ કહે નિર્ભય થાવા, આદરશું કરવી અતિ ॥૧૦॥