ભક્તિનિધિ
પદ – ૯
રાગ: પરજ
સંતો મનમાં સમજવા માટ રે, સંતો મનમાં સમજવા માટ રે;
કેદિ મેલવી નહિ એ વાટ રે; સંતો૦ ॥
જોઈ જોઈને જોયું છે સર્વે, વિવિધ ભાતે વૈરાટ1 ।
ભક્તિ વિના ભવ ઉદ્ભવનો,2 અળગો ન થાય ઉચ્ચાટ3 રે; સંતો૦ ॥૧॥
તપ કરીને ત્રિલોકીનું કોય, પામે રૂડું રાજપાટ ।
અવધિયે4 અવશ્ય અખંડ ન રહે, તો શી થઈ એમાં ખાટ્ય રે; સંતો૦ ॥૨॥
માટે ભક્તિ ભવભયહરણી,5 કરવી તે શીશને સાટ ।
તેહ વિના તને મને તપાસું, વાત ન બેઠી ઘાટ રે; સંતો૦ ॥૩॥
ભક્તિથી કાયા6 જાણે છૈયે ડાહ્યા, એવું ડાહ્યાપણું પરું7 ડાટ8 ।
નિષ્કુળાનંદ કે’ ભક્તિ કરતાં, ઉઘડે અભય પદ હાટ9 રે; સંતો૦ ॥૪॥ પદ ॥૯॥
કડવું – ૩૭
રાગ: ધન્યાશ્રી
ભક્તિ કરી હરિનાં સેવવાં ચરણજી, મનમાં માની મોટા સુખનાં કરણજી10 ।
તન મન ત્રિવિધ તાપનાં હરણજી,11 એવાં જાણી જન સદા રહે શરણજી ॥૧॥
રાગ: ઢાળ
શરણે રહે સેવક થઈ, કેદિ અંતરે ન કરે અભાવ ।
જેમ વાયસ12 વાહણ તણો, તેને નહિ આધાર વિના નાવ ॥૨॥
તેમ હરિજનને હરિચરણ વિના, નથી અન્ય બીજો આધાર ।
તે મૂકી ન શકે તને મને, જાણી ભારે સુખ ભંડાર ॥૩॥
જેમ પતિવ્રતા હોય પ્રમદા,13 તે પતિ વિના પુરુષ પેખે નહિ ।
બીજા સો સો ગુણે કોઈ હોય સારા, તોય દોષિત જાણી દેખે નહિ ॥૪॥
તેમ ભક્ત ભગવાનના, હોય પતિવ્રતાને પ્રમાણ14 ।
પ્રભુ વિના બીજું ન ભજે ભૂલ્યે, તે સાચા સંત સુજાણ ॥૫॥
જેમ બપૈયો બીજું બુંદ ન બોટે,15 સ્વાતિ16 વિના સુધાસમ17 હોય ।
પિયુ પિયુ કરી પ્રાણ પરહરે, પણ પિયે નહિ અન્ય તોય ॥૬॥
તેમ જન જગદીશના, એક નેક18 ટેકવાળા કે’વાય ।
સ્વાતિબિંદુ સમ સ્વામીનાં વચન, સુણી ઉતારી લિયે ઉરમાંય ॥૭॥
જેમ ચકોરની ચક્ષુ19 ચંદ્ર વિના, નવ લોભાય ક્યાંહી લગાર ।
તેમ હરિજન હરિ મૂર્તિ વિના, અવર જાણે અંગાર ॥૮॥
એમ અનન્ય ભક્ત ભગવાનના, પ્રભુ વિના બીજે પ્રીતિ નઈ ।
મન વચન કર્મે કરી, શ્રીહરિના રહ્યા થઈ ॥૯॥
એવા ભક્તની ભક્તિ જાણો, વા’લી લાગે વા’લાને મન ।
નિષ્કુળાનંદ કહે નાથને, એવે જને કર્યા પ્રસન્ન ॥૧૦॥ કડવું ॥૩૭॥