નેણલાં ઠરે ને હૈડે ટાઢક વળે,

નારાયણસ્વરૂપ નીરખી નેણલાં ઠરે. નારાયણસ્વરૂપ. ધ્રુવ

સભામાંહીં શોભે કેવા, પૂનમ તણા ચંદ્ર જેવા;

અંગમાંથી શીતળ તેજનાં, કિરણો સરે નારાયણસ્વરૂપ. ૧

મુખની લાવણતા મીઠી, મૂર્તિ અલૌકિક દીઠી;

હસતા મુખેથી જાણે, મોતીડાં ઝરે. નારાયણસ્વરૂપ. ૨

દિવ્ય ચપળ આંખલડી, વરસે અમી વાદલડી,

કૃપાની દૃષ્ટિથી જીવો, અનેક તરે. નારાયણસ્વરૂપ. ૩

ચાલે ઉતાવળે એવા, દર્શનનું સુખ દેવા,

લાખો મુમુક્ષુ જેની પાછળ ફરે. નારાયણસ્વરૂપ. ૪

વનમાળીદાસ કહે, શ્રીજી ઉરમાંહી રહે,

પ્રગટ પ્રભુ તણી લીલા, સાંભર્યા કરે. નારાયણસ્વરૂપ. ૫