તમારી પાંખમાં સ્વામી, અમે તો મસ્ત થૈ બેઠા,

અમારે આપને પામી, દુઃખો સૌ અસ્ત થૈ બેઠાં... ૧

નયનથી આપને મળતાં, પ્રભુનો સ્પર્શ માણ્યો છે,

સ્મરણમાં આપના પલ પલ, અમે તો વ્યસ્ત થૈ બેઠા... ૨

તમારા પ્રેમને જાણી, અમે પ્રેમી થયા સાચા,

પ્રણયના પાષમાં બંધન, અમારાં ધ્વસ્ત થૈ બેઠાં... ૩

અમારે ચાંદલો અક્ષરતણો, સૌભાગ્ય શું કહીએ,

તમારા હસ્તમાં સ્વામી, અમારો હસ્ત દૈ બેઠા... ૪

તમારા સ્નેહમાં સગપણ, અમારું શ્રીહરિ સંગે,

ભલે સંસારમાં તોયે, અમે સંન્યાસ્ત લૈ બેઠા... ૫