વચન વિધિ

કડવું – ૩

વચનમાં વરતે સંત શાણાજી, દેહ ગેહ સુખમાં જે ન લોભાણાજી

મન કર્મ વચને હરિ બોલે બંધાણાજી, એવા જન જેહ તેહ મોટા ગણાણાજી

મોટા ગણાણા તે માનવું, કર્યું ગમતું જેણે ગોવિંદતણું ॥

તે વિના મોટપ્ય નવ મળે, ફરી ફરી શું કહિયે ઘણું ॥૨॥

રાધાજિયે રાજી કર્યા, શ્રી કૃષ્ણ કૃપાનિધાન ॥

તેણે કરીને મોટપ્ય મળી, વળી પામિયા બહુ સનમાન ॥૩॥

કમળાએ કૃષ્ણને રીઝવ્યા, રીઝ્યા અલબેલો અવિનાશ ॥

તેણે કરીને તેહ પામિયાં, હરિ ઉરે અખંડ નિવાસ ॥૪॥

વૃંદા1 વચનમાં વરતી, કર્યા પ્રભુને પ્રસન્ન ॥

તેણે કરી હરિ અંઘ્રિમાં,2 રહ્યાં કરી સુખ સદન ॥૫॥

વ્રજવનિતા વચને રહી, વળી વા’લા કર્યા વ્રજરાજ ॥

તેણે કરીને તોલે તેને, ના’વે શિવ બ્રહ્મા સુરતાજ ॥૬॥

પંચાલિયે3 પ્રસન્ન કર્યા પ્રભુને, આપી ચીરી ચીંથરી ચીરતણિ4

તેણે કરી તને નગ્ન ન થયાં, વળી ભક્ત કા’વ્યાં શિરોમણિ ॥૭॥

એહ રીતે મોટપ્ય મળે, પહેલા રાજી કર્યે પરબ્રહ્મ ॥

નિષ્કુળાનંદ કહે તે વિના, ઠાલો5 પડે જાણો પરિશ્રમ ॥૮॥

કડવું 🏠 home