હરિબળગીતા
કડવું – ૧૦
રાજી કરવા પ્રગટ ભગવાનજી, સમાસમે સહુને રે’વું સાવધાનજી ।
મેલી જન મન તનનું માનજી, રાખવું હરિને રાજી કરવા તાનજી ॥૧॥
ઢાળ
તાન એમ તને મને, રાજી કરવાને હરિકૃષ્ણ ।
અહોનિશ1 રહે આલોચના,2 જાણે કેમ પ્રભુ થાય પ્રસન્ન ॥૨॥
તેને અર્થે તને કરી, કરે જપ તપ જોગ જગન ।
તીરથ વ્રત કરે વળી, રાજી કરવા ભગવન ॥૩॥
તેહ સારુ તાવે3 તનને, સહે કાયાયે કષ્ટ કોટ ।
પણ હરિભક્તની રીતમાં, આવવા ન દિયે ખોટ ॥૪॥
મેલી ગમતું નિજ મનનું, કરે ગમતું તે ગોવિંદતણું ।
જેમ વાળે તેમ વળે વળી, મૂકી મમત આપણું ॥૫॥
વા’લાના વચનનો, અતિ ઉર ઊંડો વિશ્વાસ ।
માહાત્મ્ય જાણી મહારાજનું, તજે અન્ય સુખ આશ ॥૬॥
સુખ નર નિર્જર તણાં,4 સમઝે સ્વપ્ન સમાન ।
નિર્ભય સુખ જાણી નાથનું, તેહ પર રહે ઘણું તાન ॥૭॥
એને અર્થે આપણું, ગણે નહિ તન મન ।
નિષ્કુળાનંદ તે નર પર, પ્રભુ થાશે પ્રસન્ન ॥૮॥ કડવું ॥૧૦॥