હરિબળગીતા
કડવું – ૧૯
વળી કહું એક વારતા સરસજી, પતિવ્રતા જેને એક પુરુષજી ।
પંચને1 પત્ની એક નેક નરસજી,2 એમ કહે છે પુરાણ અષ્ટાદશજી3 ॥૧॥
ઢાળ
અષ્ટાદશ આગમમાં, નિર્ણય કર્યો છે નેક ।
પતિને બહુ પતની, પત્નિને પતી એક ॥૨॥
એહ મર્યાદા પુરાણમાં, બાંધી બહુ બળવાન ।
સહુ સહુને ધર્મે રહી, ભજવા શ્રીભગવાન ॥૩॥
ધર્મદ્વેષી હરિધામમાં, નવ પોં’ચે નિર્વાણ ।
પંચાલી આદિ એ પંચનું, કેમ માનવું કલ્યાણ ॥૪॥
માટે એ વાત મૂકી દિયો, લિયો હરિ શરણનું જોર ।
ક્રિયા જોતાં કોઈની, નથી આવતો નોર4 ॥૫॥
પ્રજ્ઞાચક્ષુ5 પતિ સુણી, કરી ગંધારીએ મન ગોત6 ।
તરત નેત્ર મિચિયાં, એવી પતિવ્રતા ઉદ્યોત7 ॥૬॥
પણ શ્રીહરિના સંબંધ વિના, અર્થ ન સર્યો એક ।
શઠપણે8 સમજ્યા વિના, ઠાલી ઝાલી એહ ટેક ॥૭॥
એવા જીવ કંઈ જગતમાં, ઘણું ધર્મવાળા કે’વાય ।
નિષ્કુળાનંદ કે’ કર્ણદાની,9 જરાસંઘ બ્રહ્મણ્ય10 જગમાંય ॥૮॥ કડવું ॥૧૯॥