હરિબળગીતા
કડવું – ૨૩
માતાપિતાથી પામે પ્રાણી દેહજી, તેહમાં આવી વસે જીવ જેહજી ।
ન હોય કર્તવ્ય એહનું1 એહજી, એહના કારણ શ્રીહરિ તેહજી ॥૧॥
ઢાળ
શ્રીહરિ વિના સમાજ2 એવો, કહોને કોણથી થાય ।
શ્રવણ નયન નાસિકા, દંત જીહ્વા કરી મુખમાંય ॥૨॥
હાથ પગ આંગળીયો, નખ શિખા મુવાળા મોછ3 ।
કીધો સમાજ સુખનો, કોઈ રીતે ન રાખી ઓછ ॥૩॥
વળી અંતઃકરણ ને ઇંદ્રિયો, પ્રાણવાયુ દશ પ્રકાર ।
એવું કરતાં કોઈને, ન આવડે નિરધાર ॥૪॥
કસર કોઈ વાતની, નારાયણે રાખી નથી ।
જુવો વિચારી જીવમાં, વળી વળી શું કહું કથી ॥૫॥
જીવ જાણે હું જોર4 છઉં, જે કરું તે કેમ ન થાય ।
પણ વિચારે આવી વાતને, તો જેમ છે તેમ જણાય ॥૬॥
માટે અસમર્થ આપણે, સમર્થ શ્રીભગવાન ।
એવું સમઝી અંતરે, મૂકવું કર્તવ્યનું5 માન ॥૭॥
કર્યું શ્રીકૃષ્ણનું થાય છે, જનથી ન થાય જરાય ।
નિષ્કુળાનંદ નિહાળીયે, ઊંડું અંતરમાંય ॥૮॥ કડવું ॥૨૩॥