હરિબળગીતા
કડવું – ૧૬
મેલી પ્રતાપ ઘનશ્યામનો ઘણોજી, લિયે આશરો સાધન તણોજી ।
માને મહિમા તેમાં આપણોજી,1 બીજા કોઈ ગણો કે ન ગણોજી ॥૧॥
ઢાળ
ગણો કે કોઈ નવ ગણો, પણ નિજ પ્રતાપ માને મને ।
જોર મૂકી જગદીશનું, સુખ માને કરી સાધને ॥૨॥
સાધને કરી સ્વર્ગ લોકમાં, જાતો હતો નહૂષ નરેશ ।
શચીપતિયે2 પૂછીયું, ત્યારે કહ્યું ન કહ્યું લેશ ॥૩॥
ત્યારે અમરેશે એમ કહ્યું, પૂછે આરતવાન3 કોઈ આવીને ।
જથારથ તેને જણાવવું, ભાળી ભક્ત ભાવિકને ॥૪॥
ત્યારે નહૂષ કહે અન્નકણ ગણે, ભૂરજ4 ઉડુ5 આકાશ ।
વનપાત6 ગાતરોમાવલી,7 કરે કોઈ તેનો તપાસ ॥૫॥
પણ મારા પુન્યનો, ન થાય કોણે નિરધાર ।
એમ કે’તાં મોટપ આપણી, પડ્યો પૃથ્વી મોઝાર ॥૬॥
મેલી પ્રતાપ મહારાજનો, અને ગાયો પોતાનો ગુણ ।
આજ પહેલાં પડ્યાં કંઈ, કહોને તે તર્યો કુણ ॥૭॥
માટે ભરોંસો ભગવાનનો, રાખવો અતિશય ઉર ।
નિષ્કુળાનંદ એહ વારતા, અચળ જાણો જરૂર ॥૮॥ કડવું ॥૧૬॥
પદ – ૪
રાગ – રામગ્રી (‘મન રે માન્યું નંદલાલશું’ એ ઢાળ)
અચળ ભરોંસો ભગવાનનો, જોઈએ જનને જાણો ।
એહ વિના બીજી વારતા, પાંપળાં8 પ્રમાણો... અચળ૦ ॥૧॥
હરિપ્રતાપ હૈયા થકી, ન મટાડવો માનો ।
સમર્થ સમજવા સ્વામીને, જોવો દોષ પોતાનો... અચળ૦ ॥૨॥
સરસ ન થાવું સંતથી, રે’વું દાસના દાસ ।
દીન જાણી દયા કરે, હરે તન મન ત્રાસ... અચળ૦ ॥૩॥
એહ વારતા અનુપમ છે, નિરવિઘન નિહાળો9 ।
નિષ્કુળાનંદ બીજી વારતા, ભરી વિઘને ભાળો... અચળ૦ ॥૪॥ પદ ॥૪॥