હરિબળગીતા
કડવું – ૨
નારાયણના નામનો મોટો મહિમાયજી, સુણ્યું મેં સર્વે શાસ્ત્રમાંયજી ।
જીવ હિત અર્થે એવું નહિ કાંયજી, સમજુ સમજી સમરે સદાયજી ॥૧॥
ઢાળ
સમજુ સમજી સમરે, નિશ દિન નારાયણ નામ ।
શ્વાસ ઉશ્વાસે સંભારતાં, પળ પામે નહિ વિરામ ॥૨॥
શેષજી મહાત્મ્ય સમજી, કરે અખંડ નામ ઉચ્ચાર ।
સહસ્ર મુખમાં જુગલ1 જીભે, રટે છે એકતાર ॥૩॥
પૃથુ2 મહિમા પ્રીછીને, માગ્યા દશ હજાર કાન ।
નારાયણના નામ સુણવા, અતિશય ઉરમાં તાન ॥૪॥
હિરણ્યકશિપુ શ્રવણે સાંભળ્યો, નારાયણ નામનો નાદ ।
તપ તજી ત્રિયા3 ભજી, તેના થયા ભક્ત પ્રહ્લાદ ॥૫॥
પ્રહ્લાદ પ્રગટી પ્રીતશું, ભાવે ભજ્યા શ્રી ભગવાન ।
અભક્ત કુળમાં ભક્ત થયા, નામ પ્રતાપે નિદાન4 ॥૬॥
વિભીષણને ભક્ત થાવું, નોયે રાક્ષસ કુળની રીત ।
પણ જે જે જપે જગદીશને, તે થાય સર્વે પુનીત ॥૭॥
અસુરકુળને અઘે ભર્યા, તર્યા એવા જીવ અનંત ।
નિષ્કુળાનંદ નારાયણ નામનો, મહિમા મોટો અત્યંત ॥૮॥ કડવું ॥૨॥