સારસિદ્ધિ
પદ - ૪
રાગ: રામગ્રી
તીવ્ર વૈરાગ્ય તડોવડ્યે,1 ના’વે સો સો સાધન ।
જપ તપ તીર્થ જોગ જે, કરે કોઈ જન જગન... તીવ્ર૦ ॥૧॥
દાન પુણ્ય પાળે કોઈ ધર્મને, ગાળે હિમાળે તન ।
પ્રભુ પ્રસન્ન કર્યા કારણે, જગમાં કરે છે જન... તીવ્ર૦ ॥૨॥
પણ બૃહત વૈરાગ્ય વિના, વાયદા પ્રભુ પામવા કાજ ।
અવર2 બીજા ઉપાયથી, રાજી નો’યે મહારાજ... તીવ્ર૦ ॥૩॥
બૃહત વૈરાગ્યથી નથી વેગળા, અલબેલો અવશ્ય ।
નિષ્કુળાનંદ નજીક છે, બૃહત વૈરાગ્યને વશ્ય... તીવ્ર૦ ॥૪॥
કડવું - ૧૭
રાગ: ધન્યાશ્રી
જેને ઉર ઉપજ્યો બૃહત વૈરાગ્યજી, તેનાં ઉઘડીયાં મહા મોટાં ભાગ્યજી ।
નથી એવો લાભ બીજો કહ્યા લાગ્યજી,3 જે થકી જડે છે મહાસુખમાં જાગ્યજી ॥૧॥
રાગ: ઢાળ
મોટી જાગ્ય જડે છે જનને, તે તો જાણજો બૃહત વૈરાગ્ય વડ્યે ।
તે વિના તપાસિયું પણ, વાત નથી બેસતી ઘડ્યે ॥૨॥
તીવ્ર વૈરાગ્ય તો ઊપજે, જો કૃપા કરે જગદીશ ।
કાં તો તેના જન મળે, વૈરાગ્યવાન મુનીશ ॥૩॥
હરિકૃપા વિના હોય નહિ, પામવા બૃહત વૈરાગ્ય ।
કાં તો બૃહી4 જન હરિના મળે, તો વાત ન રહે કહ્યા લાગ્ય ॥૪॥
તેહ વિના બૃહત વૈરાગ્યની, આશા ન રાખવી ઉર ।
જેમ વણ વૂઠે5 વરસાતને, વળી ના’વે નદીયે પૂર ॥૫॥
જેમ નર નારી વિના ન નીપજે, બાળક તે બીજી પેર ।
તેમ બૃહત વૈરાગ્ય તો ઊપજે, જો હરિ હરિજન કરે મે’ર ॥૬॥
જેમ પાથ6 પૃથ્વી બે વિના, કહું કદી ન ઉપજે અન્ન ।
તેમ તીવ્ર વૈરાગ્ય તો ઉપજે, જો મળે હરિ કે હરિના જન ॥૭॥
તે વિના તીવ્ર વૈરાગ્યનો, નથી ઊપજવા ઉપાય ।
માટે હરિ હરિજનને, સેવીને કરવા સા’ય7 ॥૮॥
જેહ પામવા ઇચ્છે કોઈ પ્રાપતિ, તેને અણગર્જુ ન રે’વું અંગ ।
દાસના દાસ થઈ રહી, રહિયે વૈરાગ્યવાનને સંગ ॥૯॥
શુદ્ધ સંતથી એ સંપત્તિ, બૃહત વૈરાગ્યની મળે વળી ।
નિષ્કુળાનંદ તો તન મનના, વિકાર સર્વે જાયે ટળી ॥૧૦॥