સારસિદ્ધિ
પદ - ૨
રાગ: રામગ્રી
શુદ્ધ વૈરાગ્યે કરી સેવિયે, પ્રેમે પ્રભુના પાય ।
માયિક સુખ ન માગીયે, મોહે કરી મનમાંય... શુદ્ધ ॥૧॥
નિષ્કામી જનની નાથને, સારી લાગે છે સેવ ।
જે મોક્ષ આદિ નથી માગતા, નથી તજતા તે ટેવ1... શુદ્ધ ॥૨॥
સકામ ભક્તની શ્રીહરિ, પૂજા પરહરે દૂર ।
જાણે માયિક સુખ માગશે, જડબુદ્ધિ જરૂર... શુદ્ધ ॥૩॥
શુદ્ધ વૈરાગ્ય વિના સમજો, નર નો’યે નિરાશ2 ।
નિષ્કુળાનંદ નિષ્કામથી, રીઝે શ્રી અવિનાશ... શુદ્ધ ॥૪॥
કડવું - ૯
રાગ: ધન્યાશ્રી
વૈરાગ્યવાનનું વર્તવું વખાણુંજી, જેને માયિક સુખ સૌ સરખું જણાણુંજી
લોકાલોકે જેનું મન ન લોભાણુંજી, એક હરિચરણે ઠીક મન ઠેરાણુંજી ॥૧॥
રાગ: ઢાળ
ઠેરાણું ચિત્ત હરિચરણે, તેણે કરી તનસુખ ત્યાગ છે ।
સારું નરસું સરખું થયું, જેને ઉર અતિ વૈરાગ્ય છે ॥૨॥
ખાતાં ન થાયે ખરખરો, જેવું અન્ન જડે તેવું જમે ।
સૂકું લૂખું સ્વાદું નિરસ્વાદું, ખાઈને દિન નિર્ગમે ॥૩॥
જળ દળ ફળ ફૂલ જમી, સદાયે મને રહે સુખી ।
વૈરાગ્ય જેને ઉર ઊપજે, તે સહુ વાતે રહે સુખી ॥૪॥
ફાટ્યાં તૂટ્યાં વીણી વીથીથી,3 ઘણા ચીરાની કંથા કરે ।
શીત4 ઉષ્ણ5 નિવારવા સારુ, એવી અંગે ઓઢી ફરે ॥૫॥
સૂવા ન શોધે સાથરો,6 સુંદર સુંવાળી જાગ્ય ।
સમ વિષમ સમ સમજે, જેને તનસુખનો છે ત્યાગ ॥૬॥
રાત દિવસ હૃદયા વિષે, દૃઢ રે’ છે હરિનું ધ્યાન ।
તેણે કરી નથી આવતું, અણુ ભાર અંગે અભિમાન ॥૭॥
કોઈક નંદે કોઈક વંદે, કોઈ ના’પે આપે ખાવા અન્ન ।
કોઈ ગૃદ7 પથર ગોબર8 નાખે, તોય સદા રાજી રહે મન ॥૮॥
એવી વૈરાગ્ય વિનાની વિપત્તિ, કહો કોણ સહિ શકે શરીર ।
વેષ લિધે વૈરાગ્યને, જાણો કેમ ધરાયે ધીર ॥૯॥
વારીવારી જાઉં એ વૈરાગ્યને, જેણે જગસુખ દુઃખ જાણ્યું સહી ।
નિષ્કુળાનંદ નિરવેદ જેવું, બીજું હોય તો દેખાડો કહી ॥૧૦॥