સારસિદ્ધિ
કડવું - ૨૭
પરમ ધર્મ કહિયે સારમાં સારજી, સંત સરાયે1 જેને વારમવારજી
નથી કોઈ આવતું ધર્મની હારજી, ધર્મ તે ધારી કહું નિરધારજી
નિરધાર2 સાર શોધી કહું, ધારી લેજો ધર્મની રીત ॥
જે ધર્મે અધર્મ ટળે, કહું તે ધર્મ કરી પ્રીત ॥૨॥
ધર્મ તે ધર્મસુતનાં વચન, તેહ પાળવાં પ્રીતે કરી ॥
જેને જેમ કરી આગન્યા, તે ફેરવવી નહિ ફરી ॥૩॥
આગન્યાથી અધિક બીજો, નથી આવતો ધાર્યામાંય ધર્મ ॥
તોળી તપાસી જોયું તને મને, એ જ ધર્મ છે વળી પર્મ ॥૪॥
ત્યાગી ગૃહી જન જેહને, કરી જેને તે જેમ આગન્યા ॥
તેને તે તેમ વર્તવું, નવ વરતવું વચન વિના ॥૫॥
વચનમાં જેહ વરતે, તે પરમ ધર્મ પાળનાર ॥
વચન વિરોધી જે વરતે, તે સર્વે ધર્મ ટાળનાર ॥૬॥
અવિનાશીની જે આગન્યા, તે સમજવું શુદ્ધ ધર્મને ॥
ધારી વિચારી રાખવી હૃદયે, તો પામિયે સુખ પરમને ॥૭॥
વર્ણ આશ્રમ વેદવિધિના, ધર્મ પાળે છે ધરા ઉપરે ॥
વે’વાર અર્થે વિવિધ ભાતે, પાળે છે તે બહુ પેરે ॥૮॥
પણ પરમ ધર્મ છે વાલાનાં વચન, તે કહ્યાં જેને કૃપા કરી ॥
તેહ વિના બીજાં સર્વે, પરાં મૂકવાં પરહરી ॥૯॥
મોટો ધર્મ એ માનવો, જેહ કહ્યો ધર્મને બાળ ॥
નિષ્કુળાનંદ મુખોમુખનાં વચન, ન ઉલ્લંઘવાં કોઈ કાળ ॥૧૦॥