ધીરજાખ્યાન

પદ – ૧૩

રાગ: કડખો (‘શાંતિ પમાડે તેને સંત કહીએ’ એ ઢાળ)

સાચા સંતે અત્યંત રાજી કર્યા શ્રીહરિ, મેલી મમત તન મન તણી… સાચા

હિંમત અતિ મતિમાંય તે આણીને, રતિપતિની¹ લીધી લાજ ઘણી… સાચા ॥૧॥

દામ વામ ધામ દીઠાં પણ નવ ગમે, કામ શ્યામ સાથે રાખ્યું છે જેણે;

નામ ઠામ ન પૂછે ગામ ગ્રાસનું² રે, આઠું જામ હામ હૈયે રહે છે તેણે... સાચા ॥૨॥

એવા સંતનો સંગ ઉમંગ શું કરિયે, તો અભંગ રંગ રૂડો અંગ રહે;

દિલ ન ડગમગે પગ નવ પરઠે,³ ચિત્ત રહી ચંગે⁴ જગ જીતી લહે... સાચા ॥૩॥

સાચા સંત શૂરવીર ધીર ગંભીર છે, નીરક્ષીર કાંકરહીર⁵ કરે નિવેડો;⁶

નિષ્કુળાનંદ આનંદપદ પામીને, કે દી ન મૂકે એ વાતનો જ કેડો⁷... સાચા ॥૪॥