ધીરજાખ્યાન

પદ – ૪

રાગ: રામગરી (‘મન રે માન્યું નંદલાલશું’ એ ઢાળ)

ઇચ્છ્યા અટળ પદ આપવા, અલબેલો અવિનાશ;

આવી એમ ધ્રુવને કહ્યું રે, માગો માગો મુજ પાસ. ઇચ્છ્યા ॥૧॥

ધ્રુવજી કહે ધન્ય ધન્ય નાથજી, તમે પ્રસન્ન જ થયા;

એથી બીજું શું માગવું, દિન દુઃખના ગયા. ઇચ્છ્યા ॥૨॥

અખંડ રે’જો મારે અંતરે, પ્રભુ આવાના આવા;

મોટું બંધન છે માયા તણું, તેમાં ન દેશો બંધાવા. ઇચ્છ્યા ॥૩॥

એમ ધ્રુવજી જ્યારે ઓચર્યા,¹ લાગ્યું સારું શ્યામને;

નિષ્કુળાનંદ કહે નાથે પછી, આપ્યું અચળ ધામને. ઇચ્છ્યા ॥૪॥