कीर्तन मुक्तावली
देखत बड भाग लाग - ध्यानाष्टक-चर्चरी छंद
1-6002: सद्गुरु ब्रह्मानंद स्वामी
देखत बड भाग लाग, पोत सरस नवल पाग;
अंतर अनुराग जाग, छबि अथाग भारी.
अति विशाल तिलक भाल, निरखत जन होत न्याल;†
उन्नत त्रय रेख जाल, काल व्याल हारी.
विलसित भृंग श्याम वंक, चिंतत उर जात शंक;
मृगमद भर बीच पंक, अंक भ्रमर ग्यानी.
जय जय घनश्याम श्याम, अंबुज द्रग कृत उदाम;
सुंदर सुखधाम नाम, सांवरे गुमानी... जय ꠶ १
श्रोन कोन द्रग लकीर, तीक्षण मनु कामतीर;
नासा छबि दीप कीर, धीर ध्यान लावे.
कुंडल शुभ श्रवण कीन, नौतम कृति अति नवीन;
मनहुं हेम जुगल मीन, चंद मिलन आवे.
गुणनिधि कपोल गोर, चितवत चित लेत चोर;
ताके बिच दछन कोर, जोर तिल निशानी... जय ꠶ २
मंद मंद मुख हसंत, दारिम सम पंक्ति दंत;
समरत माहंत संत, खंत चंत कर के.
लोभित चित अधर लाल, विलसित विद्रुम प्रवाल;
राजत अतिशय रसाल, ताल बंसीधर के.
अंबक फल चिबुक जान, कंबु सम कंठ मान;
धारत शिव आदि ध्यान, आन उर न आनी... जय ꠶ ३
दीरघ अति दोरदंड, मोतिन भुजबंध मंड;
खल दल बल कर विखंड, अरि प्रचंड मारे.
हिय पर बन नवल हार, शोभित अति जलज सार;
देखत जन वारवार, अघ अपार टारे.
प्रौढ उच्च उर प्रथुल, फहरे शुभ गंध फूल;
मनि भर नंग बर अमूल, दूलरी बखानी... जय ꠶ ४
उदर तुंग अति अनूप, गुणवत तिल साम गूप;
नाभि मानु प्रेमकूप, रूप अजब राजे.
शोभित हद कटि प्रदेश, कांची नंग जडित बेश;
चिंतत उरमें मुनेश, अघ अशेष भाजे.
उरु अतंत रूपवान, गरुड पीठ शोभमान;
निज जन जेहि धरत ध्यान, प्रान प्रेष्ठ जानी... जय ꠶ ५
जानु दौ रूपवंत, लालित कर श्री अतंत;
समरत जेहि मुनि अनंत, अंत जन्म आवे.
जन मन प्रिय जुगल जंग, रोम अल्प अजब रंग;
चितवत चित चढत रंग, अति उमंग पावे.
गुल्फन छबि अधिक शोभ, स्थिति चल मन देत थोभ;
निरखत उर मिटत क्षोभ, लोभ आदि ग्लानी... जय ꠶ ६
चरन प्रष्ट चित हरात, तरु तमाल छबि लजात;
समरत ततकाल आत, रात प्रात मनमें.
जाकुं नित शेष गात, अजहुं पुनि नहि अघात;
तुलसी जेहि स्थल रहात, पात मानुं जनमें.
नख उतंग रंग लाल, शोभित मनु दीपमाल;
राजत किधुं चंद्रबाल, ख्याल करत ध्यानी... जय꠶ ७
विलसित चरणारविंद, कोमल अति प्रेम कंद;
ध्यावत भव मिटत फंद, छंद स्तवन बोले.
प्रसरत जेहि पद प्रसंग, पुन्य भरित सरित गंग;
अघ विनाश पर्स अंग, हो उतंग डोले.
राजत महीं उर्ध्वरेख, वज्रादिक सहित प्रेख;
ब्रह्मानंद देख देख, लेखत कुरबानी... जय ꠶ ८
†हो निहाल
Dekhat baḍ bhāg lāg - Dhyānāṣhṭak-Charcharī Chhand
1-6002: Sadguru Brahmanand Swami
Dekhat baḍ bhāg lāg, pot saras naval pāg;
Antar anurāg jāg, chhabi athāg bhārī.
Ati vishāl tilak bhāl, nirakhat jan hot nyāl;
Unnat tray rekh jāl, kāl vyāl hārī.
Vilasit bhṛung Shyām vank, chintat ur jāt shank;
Mṛugmad bhar bīch pank, ank bhramar gyānī.
Jay jay Ghanshyām Shyām, ambuj drag kṛut udām;
Sundar sukhdhām nām, sāvare gumānī... Jay ° 1
Shron kon drag lakīr, tīkṣhaṇ manu kāmtīr;
Nāsā chhabi dīp kīr, dhīr dhyān lāve.
Kunḍal shubh shravaṇ kīn, nautam kṛuti ati navīn;
Manhu hem jugal mīn, chand milan āve.
Guṇnidhi kapol gor, chitvat chit let chor;
Tāke bich dachhan kor, jor til nishānī... Jay ° 2
Mand mand mukh hasant, dārim sam pankti dant;
Samarat māhant sant, khant chant kar ke.
Lobhit chit adhar lāl, vilasit vidrum pravāl;
Rājat atishay rasāl, tāl bansīdhar ke.
Ambak fal chibuk jān, kambu sam kanṭh mān;
Dhārat Shiv ādi dhyān, ān ur na ānī... Jay ° 3
Dīragh ati dordanḍ, motin bhujbandh manḍ;
Khal dal bal kar vikhanḍ, ari prachanḍ māre.
Hiy par ban naval hār, shobhit ati jalaj sār;
Dekhat jan vārvār, agh apār ṭāre.
Prauḍh uchcha ur prathul, fahare shubh gandh fūl;
Mani bhar nang bar amūl, dūlarī bakhānī... Jay ° 4
Udar tung ati anūp, guṇvat til sām gūp;
Nābhi mānu premkūp, rūp ajab rāje.
Shobhit had kaṭi pradesh, kāchī nang jaḍit besh;
Chintat urme munesh, agh asheṣh bhāje.
Uru atant rūpvān, garuḍ pīṭh shobhmān;
Nij jan jehi dharat dhyān, prān preṣhṭha jānī... Jay ° 5
Jānu dau rūpvant, lālit kar shrī atant;
Samarat jehi muni anant, ant janma āve.
Jan man priya jugal jang, rom alp ajab rang;
Chitvat chit chaḍhat rang, ati umang pāve.
Gulfan chhabi adhik shobh, sthiti chal man det thobh;
Nirakhat ur miṭat kṣhobh, lobh ādi glānī... Jay ° 6
Charan praṣhṭa chit harāt, taru tamāl chhabi lajāt;
Samarat tatkāl āt, rāt prāt manme.
Jāku nit sheṣh gāt, ajahu puni nahi aghāt;
Tulasī jehi sthal rahāt, pāt mānu janme.
Nakh utang rang lāl, shobhit manu dīpmāl;
Rājat kidhu chandrabāl, khyāl karat dhyānī... Jay° 7
Vilasit charaṇārvind, komal ati prem kand;
Dhyāvat bhav miṭat fand, chhand stavan bole.
Prasarat jehi pad prasang, punya bharit sarit gang;
Agh vināsh parsa ang, ho utang ḍole.
Rājat mahī urdhvarekh, vajrādik sahit prekh;
Brahmānand dekh dekh, lekhat kurbānī... Jay ° 8
